舌劍

 

第十四夜

舌說：「依家D人，全民低頭，擁抱垃圾，離理性越來越遠，離文字越來越遠，應該點樣先可以去讓「人」把頭再提起，做番一個人？」

劍說：「其實你尋晚不斷咁問我，到底應該點樣可以去改進到人嘅問題，其實你問呢個問題，要解決古往今來幾千年嘅「人類墮落史」，咁大嘅問題，點能夠可以一兩晚解答到咧？咁龐大嘅問題，就算去圖書館睇曬所有有關人類演化嘅書，請教人類學嘅博士，也未必可以三兩晚解答到你呢個大問題。

我只能夠咁樣回答：

「法治之劍，人去人化」

第一，慶幸人類佢系過去幾百年，設計咗一個系統出嚟，叫做「法治」，法治凌駕於人之上，系一個最好嘅系統嚟，比其他教育、宗教或者政治政權政黨，甚至家庭嘅教育，都更重要。法律系凌駕所有嘢之上。

第二，因爲當「人」牽涉入任何嘅範圍裏邊，人化左，咁你就會變質，之前講過唯獨是法律，「法律」，人類已經有智慧去到可以設計一個系統，可以凌駕於人之上嘅系統，爲之「法治」，任何人犯任何法, 違咗規，你都要有後果要負責任嘅。凌駕於一切人之上，點解人咁多問題？點解個世界會咁多問題？因爲「國」凌駕於「法」之上，如果國系至高無上，宗教亦都變咗「國化」，宗教就會變質，因爲係人治唔係法治，當個宗教變成個「勢力範圍」，變了質嘅話，自私凌駕於「神」之上嘅話，渡人向善就變咗渡人向惡！

第三，你問人類點樣去進步，我嘅回答可能好荒謬：人要進步，就要「人去人化」。意思就係類似「法治」，凌駕於人之上嘅爲之去人化，所有嘅範圍包括政黨包括宗教包括學校教育，包括甚至系家庭父母教育，當你係將一套理性價值嘅法治精神「去人化」，法律（契約，公正，理性）凌駕於所有嘢之上，所有嘢都要公道。（其實法律系最講理性最去人化），公道凌駕於人之上，係呢個系統之下，咁人咪會開始慢慢去進步，呢個係好龐大嘅問題嚟嘅，希望可以答到你。

當有一個至高無上嘅法律，法治嘅精神喺一切人之上，無論你係皇帝又好，蠢豬又好，獨裁者又好，古龍式葛浪子又好，或者係黑社會或者你係教宗都好，任何人！你違規！譬如父母太過分去打個仔女，或者你整日對住電腦，上網上到癲左，批評你兩句，你就動手打人咁嘅底端野人，你嘅行為都要負翻個責任嘅，法律凌駕於所有人之上，最公正最理性嘅法律，咁個社會先至會變好。我上次講過啦，點樣由一個「惡之國」去變成「良知國」？現實係有「良之國」架，世界上依家譬如北歐啲國家就系「良之國」嚟嘅，芬蘭瑞典，佢咪就喺個法治凌駕所有人之上咯。所有人，你都要喺個法律面前，都要公正嘅，咁呢個社會先會平衡，公正，係呢個基礎上，人類就可以理性、自由咁發展自己。

舌說：「點解有良之國，世界上仲會有惡之國咧？都咁多年啦，人類啲科技咁先進，點解仲有惡之國？」

劍說：「因爲仲有啲國家佢仲系視法律如無物，高科技變成作惡嘅工具，惡之國全部都唔系法治，系人治！人治嘅法律！係非公正非理性！佢可以批評你！你唔可以批評佢！你開聲批評你就係錯！！非理性加上極度自私醜陋嘅野蠻心態！！！所以就會導致到好多問題出現！就成爲一個幾千年都冇進化過嘅「惡之國」。

要設法將「人去人化」，「人」要覺醒，將個法律變成凌駕於人之上，一個最公正嘅法治精神，咁先至能夠去改善進步。」

舌說：「權力使人腐化，絕對權力使人絕對弱智。搞到全民都一齊弱智。」

劍說：「冇一個好完善，普世認同嘅法治精神，當權嘅人凌駕於法律之上，咁就可以無法無天。無法無天嘅話，一個人嘅權力、極度自私，就可以染污整過民族，一個人嘅權力、極度自私，就可以罔顧全民族嘅將來，窒息全民族嘅發展，咁點能夠會有一個好正常好合理嘅一個「良之國」？

法律就等於一個馴獸師, 馴獸師將你呢隻好野蠻好兇猛嘅獅子老虎或者條毒蛇，呢D咁嘅畜生，本來隻畜生係好獸性嘅，就係因為有個法律凌駕於呢啲咁嘅畜生之上，凌駕於權力之上。馴服咗隻畜生，咁你就可以演變，將本來係惡性、魔性、獸性，將佢變翻做善良，變翻做一個有理性嘅人。

經過幾千年，人類就構思咗一個「法治」，真系可以凌駕於人嘅邪惡。可以制衡翻個當權者，事實嘅例子，北歐嗰啲地方系可以嘅，其實真系可以嘅，問題就係，雖然話個病源，悲劇根源喺呢個「國」字。導致人類由淳樸變成好麻木，好奴性，甚至好鄙俗好厭惡，都因爲受到個國嘅範圍影響，當權者去利用一切嘅手段，好似思想網絡，去灌輸一啲好垃圾嘅嘢，去令到你墮落，如果你覺得垃圾嘅資訊變成主流嘅話，「人」就會慢慢去變質，變成麻木不仁庸俗奴化嘅「類人」，我講嘅「人去人化」，就係呢個意思。

本來人類過去，好遠古之前，都仲未有「國」呢樣嘢嘅時候，都系比較淳樸，部落時期雖然都仲有個「範圍」，起碼都唔會太過份（大規模自相殘殺）。一來古時期冇都市化，人類居住生活比較鬆散，人都仲系比較淳樸，冇咁庸俗醜陋，自從有咗「國」之後，當權者嘅私心，喺個勢力範圍裏邊。用盡所有方法，人化宗教，人化教育，人化嘅「愛」，去把人類麻醉洗腦，令到「人」不斷喺精神上墮落，所以我就話「國」係人類悲劇之根源就係咁解，歸根究底都唔係人嘅問題，歸根究底個病源，都係呢個「國」字。

舌說：「點樣先至可以由「人治」改進爲「法治」？」

劍說：「你唔好問我，你要問,就問曬全部人，因爲係要全部人，每一個人，一齊去合力組成先至能夠做得到嘅，你問我呢個問題，我一個人係答你唔到嘅。靠一個人嘅力量，靠一個人嘅回答，係解答唔到呢個「人的問題」。

我只能好空泛咁講：

以理性之劍，自刺（反省），以劍鋒，自我重新塑構人的價值，以法治之劍，「人去人化」，以法律為基礎，以理性為中心。擺脫垃圾，離開井底，步向井口，仰觀宇宙。」

舌劍

第十四夜